KALIBO, Aklan—Uman nga nagpadumdum ro Bureau of Fire Protection (BFP) Kalibo sa publiko nga mag-doble dahan eabi eon sa paggamit ag pagkabit it mga Christmas decorations kadungan it nagahilapit nga selebrasyon it kapaskwahan.
Suno kay FO1 Jun Rey Tordecillas it BFP-Kalibo nga dapat nga siguraduhon nga eowas ro pagabak-eon nga mga Christmas lights ukon bukon it sub-standard.
Kinahangean sigon nga nag-agi raya sa pag-usisa it Department of Trade and Indusrty (DTI) ag may nagakaigo nga Import Commodity Clearance (ICC) nga nakamarka sa produkto bilang pamatuod nga raya hay nakasunod sa standards ag eowas nga gamiton.
Handum nanda nga kapareho ko buean it Agosto hay makaangkon man it zero fire incident sa banwa it kalibo makaron nga setyembre hasta sa masunod nga mga binuean.
Sa pihak nga parte, ginpahayag pa ni FO1 Tordecillas nga padayun nanda nga ginaduso sa publiko ro andang tema nga “Kaisa Akong Iiwas sa Sunog Araw-araw” agud nga mataw-an it atensyon ro fire safety tips ag makalikaw sa makahaealit nga sunog .
Dugang pa nana nga maging responsable man sa paggamit it kuryente kun sa siin dapat nga may nagakaigo nga monitoring ag inspeksyon halin sa sangka lisensiyadong technician.
