POLICE Report — Gina-imbestigahan eon it Commission on Human Rights-National Capital Region (CHR-NCR) ro pagkamatay it sangka 15-anyos nga binatilyo matapos bugbugon it sangka kagawad it Sangguniang Kabataan ag ko anang kaibahan sa Punta Sta. Ana sa Manila.
Sa makaron hay sa kustodiya eon it Manila police ro daywang suspek nga nakilaea bilang sanday SK Kagawad Mark Jhorell Dela Cruz, 18, ag kaibahan kara nga si Irineo Cardanio, 23-anyos.
Base sa report, antes nga natabu ro insidente, bandang alas-9:10 it gabi-i sa F, Manalo St., Brgy. 894 hay kaibahan it biktima ro anang mga amigo nga nag-agto sa parke para magpicture-picture.
Dikara hay ginpaeapitan sanda it mga suspek ag ginkompronta sa indi masayuran nga kabangdanan nga nagresulta sa pagbaeaywan.
Natumba ro biktima sa karsada ag nalipong rason nga gindaea sa Sta. Ana Hospital, apang gindeklarang dead on arrival.
Nagguwa nga “traumatic head injury” ro naging rason it kamatayon it biktima samtang ro daywang suspek hay ginpasakaan it kasong murder sa Manila City Prosecutors’ Office.
Samtang, nagpanawagan man ro komisyon sa lokal nga awtoridad ag Philippine National Police (PNP) nga magpatigayon it maid-id ag impartial investigation sa insidente.
