Maabong mga turista ro nagtambong sa Vatican kasunod it napabalitang pagkamatay ni Pope Francis.
Suno kay Girlie Ongoco, Bombo International News Correspondent sa Rome, Italy, tumunog ukon kumalampag eon ro kampana nga senyales nga ro santo papa hay binawian eon it hueam nga kinabuhi. Senyales man sigon raya it pag-luksa ag pagprepara para sa haya it santo papa.
Ginpahayag man ni Ongoco nga tatlong beses gina butang ro eawas it santo papa sa kabaong, ro cypress, lead, ag oak, ag may 9 days it pagluksa. Posible man sigon nga mag-angkon it public viewing sa sueod it 9 days para man makita it mga tumueu-o ro haya it santo papa.
Paathag man ni Ongoco nga maga-umpisa eamang it pili it panibag-ong santo papa kun maeubong eon si Pope Francis. Sa ana sigon nga pagkasayod hay maabo pang proseso ro dapat tapuson kapareho it pag-samad sa sing-sing ni Pope Francis nga ginagamit bilang stamp sa mga dokumento.
Dugang pa nana nga indi sigon magpa-eubong ro santo papa sa Vatican kundi ro anang gusto hay maeubong imaw sa sangka basilica.
Paathag dugang ni Ongoco nga makakieibot ro pag-anunsyo it kamatayon it santo papa bangud uwa pa it 24 hrs kat ulihi imaw nga nagpakita para sa pagselebrar it Paskwa it Pagkabanhaw.
