KALIBO, Aklan–Padayun nga gina-imbestigahan it mga otoridad ro pagkasamad it ‘welcome sign’ nga himo sa LED lights sa arko sa boundary it Banga ag Kalibo.
Apang suno kay Punong barangay King Belarmino it Brgy. Linabuan Sur, Banga nga base sa pag-review nanda sa CCTV it sangka establisimento komersiyal, natukiban nga owa ginmalitan kundi nga aksidente ro pagkasamad it portion it nasambit nga LED lights.
Sangka aktibidad sigon ro ginpatigayon sa lugar ko nagtaliwan nga adlaw nga naggamit it pison nga nakaangkon it vibration sa eugta nga posibleng naging rason it pagkaeog it arko ag ginkasamad it LED lights.
Imposible man sigon raya nga gin-eapog it bato ukon inagyan it mabahoe nga trucking bangud nga masyadong mataas.
Madumduman nga ginkasubo ni Kalibo mayor Juris Sucro ro pagkasamad it welcome sign sa nasambit nga lugar.
Suno sa alkalde nga ro gingastos sa proyekto hay naghalin sa anang kaugalingon nga boesa sa tuyo nga makaangkon it mayad nga pag abi-abi sa mga bisita ag turista nga nagapasueod sa Kalibo.
Nasayuran nga mag-eowas sa lugar, may kapareho man nga welcome sign nga ginbutang sa entrance it kalibo-numancia bridge ag sa may golden salakot sa Mabini St. ag Corner D. Magma St. Kalibo.
