Ginhaluan it politika ro pagkatumba ni US President Joe Biden matapos nga masandad ag maduea-an it balanse samtang nagatau it diploma sa graduation ceremony it mga kadete sa US Air Force Academy sa Colorado ko Huwebes nga adlaw.
Suno kay Bombo International Correspondent Greg Aguilar it California, USA nga bangud nga political season makaron sa Amerika rason nga ginabantayan ro kada hueag it mga posibleng magakandidato sa pagka-pangueo.
Madumduman nga ro video it nasambit nga insidente hay madasig nga nag viral online.
Ginasugid nga ro Pangueo sa edad nga 80 nga ginakabig nga pinakamagueang nga nagpailihir sa posisyon hay posibleng uman nga magapadaeagan para sa anang ikaywang termino.
Maskin sigon ro anang mga kaparehong democrats hay napabalita nga mas gusto nanda ro mas bata nga kandidato.
Apang may nagahambae man nga maskin nga magueang eon hay naging mayad raya sa pagresolba sa mga problema it nasyon.
Sa makaron hay una sa mayad nga kahimtangan si Biden ag owa it dapat nga kabaeak-an suno sa white house.
Nasayuran nga haeos sang oras ag tunga nga nagtindog si Biden para mag-tau it diploma ag maglamano sa nagtapos nga 921 nga kadete.
Suno sa White House nga nasandad ro Pangueo sa itom nga sandbag nga una sa stage sa tunga it okasyon.