KALIBO, Aklan — Bangud sa naexperiensiyahan nga dry spell ukon tigmaeaea sa probinsiya it Aklan rason nga nagnaba ro nabakae nga paeay it National Food Authority ukon NFA.
Suno kay Andy Ostan, Acting Assistant Branch Manager it NFA Capiz Branch Office kun sa siin under ro NFA Aklan, masyadong manaba ro patubas it mga mangunguma partikular sa Western side it probinsiya bangud sa kawad-an it supply it tubi halin sa mga irigasyon.
Naga abot pa eamang sa 4,000 bags it paeay ro andang nadaeawat nga masyadong maeayo sa target nga 80,000 bags makaron nga cropping hasta sa Disyembre.
Sa pihak nga parte, sigidas ro pagpamakae it paeay it NFA kun sa siin ginatutukan nanda ro mga maeayo nga barangay.
Suno kay Ostan nga padayun nanda nga ginasunod ro bag-ong buying prices nga gintaeana it malakanyang kada kilo nga P19 hasta P23 para sa oga nga paeay ag P16 hasta P19 para sa eabtong.
Dugang pa nana nga maskin Sabado ag Domingo hay haum nga magbakae it paeay ro andang aklan grains center sa Brgy. Linabuan Sur, Banga kamana man nga nagahueag ro andang mobile procurement team sa nagkaeain-eain nga banwa sa probinsiya.
Aminado man si Ostan nga naging hugut nanda nga kakumpetensiya sa pagbakae it paeay ro mga pribadong rice traders nga kon amat hay naga-abot it hasta sa 25 pesos per kilo ro andang pagbakae it oga nga paeay nga mabahoe nga bulig man sigon agud nga magtaas ro kita it mga mangunguma.
