KALIBO, Aklan—Gin-insister it lokal nga gobyerno it Malay nga uwa it pagbag-o ro andang ginaduso nga ordinansa kaangot sa pagpataas it environmental fee sa kutob sa nagasueod sa isla it Boracay.
Suno kay Malay Sangguniang Bayan member Maylynn Aguirre-Graf, maskin nga ginbalik it Sangguniang Panlalawigan it Aklan ro andang proposed ordinance agud nga rebyuhon raya it uman hay uwa gihapon it pagbag-o ro andang panindugan.
Ginpaathag nga inde kasapar sa presenteng panuktan sa environmental fee ro maintenance it isla bilang international tourist destination.
Sandig sa proposed Municipal Ordinance No. 414 series of 2020, halin sa presenteng 75 pesos nga environmental fee hay posibleng magtaas raya it 300 pesos para sa foreign tourist, 150 pesos sa domestic tourist ag maging ro mga Aklanon nga bukon it residente it banwa it Malay hay magabayad it 50 pesos.
Nasayuran nga ko nagtaliwan nga dag-on eamang ginpatuman it LGU-Malay ro 75 pesos nga panuktan sa environmental fee halin sa 50 pesos, kon sa siin ginsuportahan raya ni Department of Environment and Natural Resources (DENR) agud mapabilin ro rehabilitasyo nga ginahimo sa isla.
Ro Boracay hay ginpaidaeom sa an-om nga bueang rehabilitasyon halin ko buean it Abril hasta it Oktubre 2018.
Kapin sa 14.258-million pesos ro utang it LGU Malay para sa tipping fees ag 92.041 pesos sa hauling services ko 2019 sa ECOS Sanitary Landfill and Waste Management Corporation, ro naka-kontratang kompaniyang nagahakot it basura sa Boracay.
