Kalibo, Aklan-Eubus ro kalipay it lokal nga gobyerno it Kalibo matapos nga makuhit ro 1st Runner Up for Best Booth sa Cities and Municipalities Category sa ginpatigayon nga 35th Philippine Travel Mart sa SMX Convention Center, Pasay City. Ginpanginbulahan ni Kalibo Mayor Juris Sucro ro tanan nga nagpatikasog nga mapanami ro presentasyon it banwa it Kalibo nga naging yabe sa andang kadaeag-an.
Masobra sa 300 exhibitors halin sa 18 ka mga rehiyon ro nagpasakop sa pinakamabahoe nga travel fair agud nga ipakilaea ro mga bukon it masyadong kilaeang atraksyon mag-eowas sa mga sikat nga destinasyon. Nagbuhay sa sueod it tatlong adlaw ro event nga nagtipon it mga hotel, resort, travel agency, tour operator, ag tourism office nga nagtapos kahapon nga adlaw it Dominggo, Setyembre 8.
Ro travel mart fair makaron nga dag-on hay may temang “Next Gen Tourism: Connecting Cultures, Shaping the Future,” kon sa siin ginpakilaea it kada rehiyon ro andang kultura, atraksyon, kulay, ag mga eaha nga nagmarka it andang mga lugar. Madumduman ko nagtaliwan nga dag-on hay kapin sa 60,000 nga bisita ro nag-adto sa nasambit nga event nga nag-generate it P250 milyon pesos nga sales.
Ro Philippine Travel Mart hay madinaeag-on nga natigayon kabulig ro Philippine Tour Operators Association (PHILTOA), Department of Tourism, ag Tourism Promotions Board.
