KALIBO, Aklan — Sa tuyo nga mapabaskog ro paghugpong ag relasyon it kada pamilya nga nagapakita it mayad nga pagbinatasan it mga Pinoy, ginaselebrar ro National Family Week celebration nga kon sa siin ika-27 anyos eon makaron.
Suno kay Ferdinand Macogue, Supervising Human Resource Specialists it Civil Service Commission ukon CSC-Aklan nga raya hay bilang pagsunod sa Presidential Proclaimation No. 60 series of 1992.
Raya hay ginapangunahan it Department of Social Welfare and Development ukon DSWD nga may tema makaron nga dag-on nga “Tungo sa Maginhawa, Matatag, at Panatag na Pamilyang Pilipino”.
Ginpahayag dugang nga ro selebrasyon hay nag-umpisa ko Setyembre 23 ag magatapos sa Setyembre 28.
Gina-engganyo ro tanan nga mga ahensiya it gobyerno kamana man ro mga state universities and colleges nga suportahan ro selebrasyon pinaagi sa pagbagting it family bell ukon dueueungan nga pagbagting it bells bandang alas-12:00 it udtro adlaw.
Raya sigon hay simbolo it awareness ag commitment sa bilog nga nasyon agud nga dumdumon ro paghugpong it kada pamilyang Pilipino.
Bandang alas-8:00 man it agahon hay dueueungan nga ginabagting ro bells it mga state universities and colleges bilang simbolo it suporta sa pamilyang Pilipino.
Nasayuran nga ko Lunes hay ginpasugtan it mga ahensiya it gobyerno ro andang mga empleyado nga mag-uli it temprano bandang alas 2:00 it hapon agud nga makaibahan ro andang natungdan nga pamilya sa pag-ilabas.
Gin-kumbinyo man it National Committee on the Filipino Family ukon NCFF ro tanan nga pamilyang Pilipino nga magpasakop sa “Kainang Pamilya Mahalaga Day”. //
