KALIBO, Aklan—“Ro tanan nga naga-abuso sa gahum hay may katapusan.”
Raya ro reaksyon ni Sangguniang Panlalawigan (SP) member Atty. Harry Sucgang sa naging sentensiya it korte sa Maguindanao massacre case ko Huwebes, Disyembre 19, 2019.
Suno kay Board Member Sucgang nga ro pagsentensiya sa mga nagapangunang akusado sa makangieidlis nga krimen sa kasaysayan it nasyon hay magaserbing padumdum sa mga kriminal ag mga abusadong pulitiko nga indi sanda makapaeagiw sa laye ag hustisya.
Sa pihak nga parte, ginpahayag pa ni Sucgang nga kabay nga ro mga naabswelto sa kaso hay minatuod nga inosente sa krimen.
Nagapati ro opisyal nga bangud sa kakueangan it ebidensiya hay owa napamatud-an nga may conspiracy ukon kunchabahan nga natabu.
Gindayaw man nana ro anang amiga nga si Quezon City Judge Jocelyn Solis-Reyes sa ginpapanaog kara nga sentensiya nga Reclusion Perpetua nga owa ot parole nga suno kana hay patas eamang ag makatarungan.
Sa pihak nga parte, kinamatarung sigon it mga na-convict nga mag-apela sa court of appeals ag supreme court, apang bangud sa mga mabakod nga ebidensiya mag-eowas pa sa public opinion hay panigurado nga maga-agi ro mga raya sa buho it dagum.
Samtang, obligado man sigon ro mga akusado nga magbayad it danyos sa mga naaywan nga pamilya it mga biktima bangud nga engkaso nga mapas-eawan hay madugangan it dinag-on ro andang sentensiya nga pagkakulong.
