KALIBO, Aklan – Eubos ro kalipay it grupo it mga rider sa probinsiya it Aklan sa pagsuspendi ni Pangueong Rodrigo Duterte sa pagpatuman sa RA 11235 ukon Motorcycle Crime Prevention Act.
Sa interview it Bombo Radyo Kalibo, ginpahayag ni Keneth Ang, presidente it Aklan CRB Rider’s Club nga nalipay sanda sa nangin desisyon it pangueo bangod para man raya sa kaeuwasan it mga riders ag mga bystanders.
Suno kay Ang, ro nasambitan nga mabahoe nga dobleng malalaking plaka para sa mga motorsiklo hay posibleng makahalit sa ibang mga motorcycle riders ag mga tawo sa palibot.
Ginpunto man kara nga raya hay maka-apekto sa aerodynamics bangod sa owa nakadesinyo ro mga motorsiklo iya sa nasyon para sa daywa ka mga plaka.
Posible sigon nga madueaan it balance ukon kung sumubeang sa mabaskog nga hangin hay mahukas raya ag makatama sa ibang motorista o bystander sa mga karsadahon.
Sa pihak nga parte, nagpahayag it pagpabor ro presidente it Aklan CRB Rider’s Club kung sa baylo nga plaka hay stickers eon lang ro ibutang sa prenti it motorsiklo.
Suno kay Keneth Ang, owa sanda kara nagapamaeabag eabi eon kung para sa ikamayad ag ikaayos it mga riders ag ku bilog nga komunidad.
