KALIBO, Aklan – – – Hugot ro pagpati ni Magdalo Partylist Representative Gary Alejano nga naimpluwensiyahan ni Pangueong Rodrigo Duterte ro pagta-o it 1,000 pesos nga budget sa Commission on Human Rights (CHR).
Masubo sigon raya para sa nasambitang ahensiya it gobyerno bangud sa mabahoe ro magiging epekto kara sa andang operasyon.
Ginapwersa suno kay Alejano ro CHR agud magsunod sa direksyon it administrasyon nga inde eon mag-imbestiga sa mga pang abusong ginahimo it pulisya sa idaeom it kampanya kontra sa illegal nga droga.
Inde sigon maikaila nga may mga bayolasyon sa human rights ro mga pulis kasunod it kamay nga bakal nga pagpatuman it administrasyong Duterte sa “war on drugs.”
Dugang pa kara nga ro mga tawongbayan ro nagapasweldo sa CHR ag uwa raya nagahalin sa boesa it House Speaker ag ni Pangueong Duterte.
Naga-eaum man si Alejano nga mabag-o pa ro botohan sa pagpatigayon it third and final reading it Kongreso para sa budget it CHR.
