NEWS Analysis– Sa Oktubre 30, 2023 pagahiwaton ro Barangay ag Sangguniang Kabataan Elections (BSKE).
Maabu ro nagahambae nga magiging madugo ro nagahilapit nga elections rason nga ginahinyu nga raya hay ipaiway.
Apang suno sa Commission on Elections (Comelec), madayun ro election.
Haum eon sigon ro tanan nga pagahiwatan kara.
Suno man sa Philippine National Police (PNP) nga haum eon man sanda sa maabot nga eleksyon.
Ro pagkabaeaka sa kinagamo sa eleksyon hay mas pang nadugangan bangud sa mga nagakatabu nga pag-ambush sa mga opisyales it barangay ag sangguniang kabataan.
Medyu ginbuhian nga mga bang-aw nga ayam ro mga hired killers nga puro pagpang-ambush ro gina-obra mga magapadaeagan sa election.
Bukon eamang it mga barangay officials ro ginapatay kundi mga mamamahayag.
Ro pagpatay kay Negros Oriental governor Roel Degamo ko Marso 4 hay gina angot sa loose firearms.
Suno sa PNP maabu nga bukon it rehistradong baril ag maabu man ro expired eon ro lisensiya.
Sa report it PNP, may una nga 8, 313 nga baril ro expired eon ro mga lisensiya.
Pabaskugon pa it PNP ro pagdakop sa loose firearms agud nga maging panatag ro nasyon partikular eon sa pagpatigayon it barangay ag sangguniang kabataan elections sa Oktubre.
