Kalibo Aklan —–Nakadepende kay Governor Florencio Miraflores kun ano ro posibleng matabu pagkatapos it Abril 30 nga Enhanced Community Quarantine sa bilog nga probinsiya it Aklan.
Suno kay Ibajay Mayor Jo-en Miraflores ag League of the Municipalities of the Philippines ukon LMP President Aklan Chapter nga pila sa anang posibleng igasuhestyon hay ro padayun nga pag-instrikto sa border control, amat-amat nga pagbukas sa mga maintok nga negosyo kapareho it mga hardware ag iba pa .
Posible man sigon nga igabalik ro biyahe it mga pampublikong saeakyan apang limitado eamang ukon 50 porsiyento it seating capacity ro pwedeng makasakay agud nga mapatuman sa gihapon ro social distancing .
Mag-eowas kara, daywang pasahero eamang ro pagapasugtan sa mga tricycle.
Pabor man ro alkalde nga magapadayun ro curfew agud nga malikawan ro pagwinarang it mga tawo eabi eon sa gabi-i.
Gindugang pa ni Mayor Miraflores nga bangud nga nagnaba eon ro numero it kaso it coronavirus disease (COVID-19) sa probinsiya hay nagakahueugan eamang nga naging epektibo ro mga tikang it Provincial Government .
Mabahoe sigon ro kontribusyon it mga pumueuyu rason nga naging epektibo ro ECQ .
Ro pagbukas sigon it klase hay nakadepende sa Department of Education (DepEd).
Bukon man sigon sanda it pabor sa pagpatigayon it mga kapiestahan makaron nga may health crisis pa kamana man ro pagbawi sa liquor ban.
Samtang, mabahoe man sigon nga bulig sa decision making ro ginpatigayon nga study it University of the Phils. ukon UP visayas nga may titulong “Gradual Easing of Enhanced Community Quarantine Scheme in Iloilo City: Inputs to the Lockdown Exit Plan” agud nga malikawan ro second wave ukon uman nga break-out it sakit.
