Ginpahayag it Philippine Atmospheric, Geophysical and Astronomical Services Administration (PAGASA) ko Huwebes, opisyal eon nga nagsueod ro tigueu-ean.
Ro pagdeklara it tag-uean hay ginbase it PAGASA sa limang sunud-sunod nga pag-uean sa maabung parte it Luzon ag Visayas.
Sa pagkadeklara it tigueu-ean, dapat nga magpahaum ro pumueuyu sa mga problemang daea it tag-uean .
Unang problema hay ro baha, sunod ro basura ag ikatlo hay ro dengue.
Raya ro mga nagapangunang problema sa tiempo it tag-uean particular sa Metro Manila.
Raya ro ginapas-an it mga pumueuyu kada dag-on.
Indi masolusyunan ro pagbaha sa Metro Manila.
Maabu eon nga gin-obra nga proyekto nga gingastusan it mabahoe nga kantidad apang nagapabilin sa gihapon ro pagbaha.
Sangkiri nga uean hay baha eagi.
Maabung basurang plastic sa drainages, estero ag iba pang gina-iligan it tubi.
Owa eon it may naga ilig nga tubi sa mga estero ag kanae bangud sa kaabuon it basurang plastic.
Ro mga owa it disiplinang pumueuyu ro dapat nga basueon sa pagkalhit it basura.
Bukon eamang ro mga plastic nga basura kapareho it botelya it softrink, cup it noodles, sachet it shampoo, toothpaste tube, 3-in-1 coffee ag nadugang ro mga gingamit nga face masks.
Kon maabu ro nakatambak nga basura, dikara naga-istar ro mga namok nga nagadaea it dengue .
Paboritong gina-istaran ag gina itlugan it mga namok ro basurang plastic nga may tubi.
Sa report it Department of Health (DOH), gindeklara eon ro dengue outbreak sa Zamboanga City kun sa siin may nailistang 900 nga kaso umpisa Enero 1 hasta Abril 1, 2022.
Sa nasambit nga numero, 11 eon sigon ro namatay ag kaabuan kara hay mga unga .
Mag-eowas sa Zamboanga, may mga kaso man it dengue sa Davao Region, Western Visayas ag Cagayan Valley.
Padayunon ro paglimpyo sa mga drainage ag estero agud nga malikawan ro pagbaha.
Makaangkon man it disiplina ro pumueuyu sa pagpilak it andang basura eabi eon ro mga plastik nga naga-bara sa mga gina-iligan it tubi.
Maglimpyo it palibot agud nga indi mabuhi ro mga namok nga nagadaea it dengue.
