Ginpamalibaran it Malacañang nga may espesyal nga pagtrato kay dating Senador Ramon “Bong” Revilla Jr., matapos imaw nga pasugtan nga makapagpyansa sa anang ginapangatubang nga kasong malversation.
Raya hay kasunod it pagkabaeaka it pilang grupo nga posibleng makaapekto sa kampanya kontra korapsyon it administrasyon ro desisyon it Sandiganbayan.
Suno kay Palace Press Officer Undersecretary Claire Castro, owa it kahilabtanan si Pangueong Ferdinand Marcos Jr., sa naging desisyon it Sandiganbayan bangud nga separado ro gahum it hudikatura sa ehekutibo.
Ginpamilit man ni Castro nga kun may special treatment kay Revilla bilang kaalyado it pangueo hay bukon kunta it imaw ro naging unang personalidad nga kinasuhan angot sa maanomalyang flood control projects.
Ginklaru pa it Palasyo nga bukon pa it tapos ro kaso ni Revilla bangud nga piyansa eamang ro ginpasugtan it korte samtang nagapadayun ro pagbista.
