Kalibo Aklan —–Kapin sa 150 pesos ro panueoktan sa pamasahe sa L300 van halin sa Kalibo to Caticlan vice versa.
Raya hay matapos nga nagbawas it 50 porsyento sa pasahero agud nga masunod ro physical distancing sa sueod it saeakyan.
Suno kay Noemi Panado it Kalibo International Airport Transport Association (KIATA) Inc., antes magsakay ro pasahero hay anda anay nga ginapaintindi sa mga raya kon ham-an it kinahang-ean nanda nga magpataas it pamasahe maskin nga uwa sanda it tarrifa maghalin sa Land Transportation Franchising and Regulatory Board ukon LTFRB.
Ginpaathag nga kon mag-apply sigon sanda sa LTFRB it dugang nga panueoktan sa pamasahe hay mabuhay pa antes nga maaprubahan rason nga ginatig sambilog nanda it paintindi ro mga pasahero ag uwa man sigon sanda it nabaton nga reklamo.
Suno kana, gusto man it mga commuters nga makaabot gilayon sa anda nga destinasyon rason nga uwa man sanda it kwestyon sa gulpi nga pagtaas it panueoktan it pamasahe.
Ginpahayag dugang ni Panado nga nagasunod man sanda sa protocol ag guidelines nga ginapatuman it LTFRB agud nga makabulig sa pagtapna sa Covid-19 infection.
Haeos tanan sa transport sektor hay nagapanghayhay sa anda nga kita adlaw-adlaw apang kinahang-ean sigon nanda nga magsunod sa ginapatuman nga sueondanan it gobyerno ag bilang adjustment eon man sa igapatuman nga new normal kon mabueo eon sa general community quarantine ro bilog nga probinsya it Aklan.
