KALIBO, Aklan— Ginaeauman nga sa uman nga pagbukas it Boracay sa Oktubre 26 hay magataas it syento porsiyento ro pamasahe sa baroto patabok sa Isla ag pabalik sa Caticlan, Malay.
Raya hay matapos nga aprubahan it Maritime Industry Authority ukon Marina sa Iloilo City ko Oktubre 10 ro proposal ni Godofredo Sadiasa, chairman it Caticlan Boracay Transport Multi-Purpose Cooperative ukon CBTMPC para sa fare increase bangud sa padayun nga pagtaas it presyo it langis.
Halin sa dating P25 pesos hay magiging P50 pesos eon ro pamasahe it mga turista, bisita ag residente paagto sa Boracay.
Para man sa mga estudyante, pagasukton ro mga raya it P42.50 pesos samtang ro mga senior citizens ag persons with disability hay P40 pesos.
Target it transport cooperative nga ipatuman ro pagpataas it pamasahe matapos ro publication kara sa mga lokal nga peryodiko.
Sa makaron hay temporaryong ginhimo nga boat stations ro main beach it inter-agency task force samtang nagapadayun pa ro road widening ag construction it drainage systems.
