Kalibo Aklan —–Ginhinyu it pamilya it sangka 24 anyos nga Akeanon Public School Teacher nga nakabase sa Metro Manila nga indi anay magpaguwa it anuman nga espekulasyon angot sa rason it ginkamatay kara.
Raya hay kasunod it mga nagakalhit nga impormasyon sa social media nga namatay raya sa coronavirus disease (COVID-19).
Suno sa anang pamilya nga nagpamalibad nga magpamitlang it pangaean nga owa pa it resulta kon ano ro anang ginkamatay may daywang domingo eon ro nagtaliwan, apang ginakabig imaw nga suspected COVID- 19 patient bangud sa mga gina-angkon nga sintomas.
Nasayuran nga ro pasyente hay kamanghuran sa magmaeanghud ag ko Disyembre ro anang ulihi nga pag-uli sa Aklan .
Ginasugid nga ko nagtaliwan nga Marso 23 hay nag-grocery ro pasyente ag pagkatapos it pilang adlaw hay nakabatyag imaw it sore throat ukon pagsakit it tutunlan .
Ginresetahan sigon imaw it antibiotics matapos nga magpa-check-up sa doktor nga ko ulihi hay mas pa nga nag-grabe ro anang kundisyon .
Pilang ospital man sigon nga gindaehan kana ro nagpamalibad hasta nga ko ulihi hay na-admit imaw sa Taguig Medical Center sa sueod it daywang domingo ag ginpaidaeum sa intubation sa katung-anan it pakikipagsukoe sa sakit .
Nasayuran nga ro anang magueang nga kaibahan nana sa baeay sa Manila hay naka-home quarantine man makaron ag ginboe-an it specimen sample .
Bangud nga private hospital hay nag-abot sa masobra sa sang milyong piso ro andang hospital bill .
Samtang, emosyunal man ro pamilya kara sa Aklan bangud nga abo eon raya nga iga-uli sa pilang mga inadlaw matapos nga ginpaidaeum sa cremation ro anang bangkay kahapon .
Ginpromisa man it anang pamilya sa Bombo Radyo nga magatau it Official Statement sa oras nga mabaton nanda ro confirmatory result it anang COVID test.
