KALIBO, Aklan—Proud gihapon ro pamilya ni Carlo Paalam sa Cagayan de Oro City sa anang kadaeag-an sa 2020 Tokyo Olympics journey.
Si Paalam hay maga-uli it silver medal matapos nga pierdihon it pambato it Great Britain nga si Galal Yafai para sa men’s flyweight competition.
Suno kay Michellen Paalam, igmanghud it pinoy boxer nga maskin nga napas-eawan imaw nga masungkit ro bueawan nga medalya para sa Pilipinas hay masadya gihapon sanda eakip ro andang mga ginikanan nga nag-abang ag nagtutuk sa anang pagsabak sa olimpiyada.
Nagapati sanda nga gin-obra ni Carlo ro tanan sa kutob sa anang masarangan.
Kuntento sigon sanda sa naabot it anang igmanghud bangud nga bukon it hinangae nga makaangkon it Silver medal.
Nasayuran nga antes ro pagsaka sa ring ni Carlo hay masyadong emosyunal ro andang ina ag pirme nga nagapangamuyo bitbit ro anang rosarito.
Ro importante suno kanda hay owa it anuman nga naagum nga lastro si Carlo.
Sa pihak kara, ginpasaeamatan ni Michellen ro tanan nga mga nagbulig ag nag suporta sa anang igmanghud kamana man ro nagpaabot it pangamuyo sa anang pagsabak sa olympiyada sa kauna-unahang kahigayunan.
Owa pa sigon sanda nakasayod sa mga masunod nga plano ni Carlo pagkatapos it anang silver medal win.
