KALIBO, AKLAN — Matapos nga gin eubong ku adlaw it Sabado, naga eaum ro pamilya ni Dr. Dreyfuss Perlas sa Batan, Aklan nga mataw-an sa gihapon it hustisya ro pagkamatay kara matapos binaril patay samtang naga pauli halin sa medical mission sa Kapatagan, Lanao del Norte ku Marso 1.
Suno kay Mrs. Leovigilda Perlas, ina it biktima nga gina tugyan sigon nanda sa mga otoridad ro imbestigasyon kadunghan it pagtuhaw it mga impormasyon nga personal grudge ukon selos ro naga pangibabaw nga anggulo nga posibleng motibo sa krimen.
Samtang sa interview it Bombo Radyo, gin pahayag ni Senior Supt. Faro Antonio Olaguera, provincial director it Lanao del Norte nga posibling may kaangtanan ro pagpatay kay Perlas sa pagiging maeapit kara sa sangka babayeng Maranao nga bukon man kara it karelasyon.
Malisod sigon maintindihan ro kultura it Maranao eabi eon ro konserbatibong pamilya nga owa nagustuhan ro closeness it daywa.
Sa makaron hay may ap-at nga “persons of interest” ro gina tutukan it mga pulis nga pwedeng makatao it lead sa pagsolbar sa krimen matapos nga makabo-oe it mga impormasyon sa cellphone ni Dr. Perlas.
Mag eowas kara, sangka testigo ro nagtuhaw nga nakasaksi sa pagbaril-patay sa biktima.
Nauna eon nga nagpamalibad ro mga rebeldeng grupong Revolutionary People’s Army (RPA) ro pagkadaeasa it sambilog sa andang miyembro nga napatay it mga otoridad ku nagtaliwan nga dominggo.
Naga abot eon sa P150,000 ro reward money para sa tipster para sa kasolbaran it kaso.
