KALIBO, AKLAN — Eubos ro pagkasubo sa makaron it pamilya sa Aklan it sangka municipal doctor matapos nga binaril-patay samtang naga pauli maghalin sa medical mission sa Kapatagan, Lanao del Norte.
Si Dr. Dreyfuss Perlas, 31, residente it Poblacion, Batan, Aklan hay may pilang dag-un eon nga nagatrabaho sa Municipal Health Center it Sapad, Lanao del Norte.
Suno kay Batan Sangguniang Bayan (SB) member Dennis “Bocay” Perlas, ama it biktima nga indi nanda eubos maisip kun ham-an pinatay ro anang unga sa pihak nga mabuot rayang klase it tawo.
Apisar sigon nga tapos eon ro andang assignment bilang “Doctor to the Barrios” hay mas gin pakamayad it anang unga nga magpa-aywan sa nasambitan nga lugar agud padayunon ro pagbulig sa mga kubos ag masakiton.
Bandang alas-7:00 kabie samtang naga pauli sa anang gina upahang baeay halin sa medical mission hay gin eambangan sigon raya it mga armadong kaeaeakihan ag binaril gamit ro .45 kalibre nga baril.
Nakaangkon raya it sambilog nga tama it bala sa likod kun sa siin inigu ro anang baga rason nga patay eon raya kat makaabot sa ospital.
Base sa inisyal nga imbestigasyon, may kahilabtanan sa anang trabaho ro pagpatay sa biktima matapos nga may nakaalitan sigon rayang pasyente ku nagtaliwan nga mga inadlaw.
Si Dr. Perlas hay nagtapos it medisina sa West Visayas State University sa Iloilo City noong 2011.
