IBAJAY, Aklan—Nakaalerto makaron ro mga kabarangayan sa banwa it Ibajay bangud sa serye it panakawan partikular ro pagsueod sa mga kabaeayan.
Sambilog sa nabiktima hay ro baeay mismo ni punong barangay Dindo Muyo it Colong-Colong, Ibajay.
Ginhana suno kana nga takawon ro daywang ka cellphone it anang gumankon, apang raya hay gin-abandona man it mga manakaw sa likod nga portion it andang baeay matapos matukiban it mga raya nga may GPS ukon locator ro gadget.
Maskin sigon ro mga naka-garahe nga mga motorsiklo hay ginatakaw ag kon amat hay ginaboe-an it gasolina.
Samtang, may ginatumod eon man sigon sanda nga mga persons of interest nga dati man nga naeakot sa insidente it panakawan sa andang lugar nga puro mga out of school youth ag may grupo nga gina-imbolbaran.
May mga naireport man sigon nga insidente nga may pilang indibidwal nga nagapanuktok sa mga kabaeayan sa dis oras it gabi-i.
Posible suno kana nga eapnaag ro panakawan sa lugar bangud sa pag-abu it mga access roads ag paggamit sa mga motorsiklo nga get-away vehicle.
Samtang, laygay it opisyal sa mga residente nga pirmeng i-double check kon naka-kandado ro baeay engkaso nga may ginapanawan ag kon owa it naka-install nga CCTV camera hay magpatinti it iwag agud nga indi mataw-an it kahigayunan ro mga manakaw nga makapamentaha.
