Gin-engganyo ni Senador Francis “Kiko” Panghilinan ro mga Local Government Units (LGUs) nga aktibong ipatuman ro Sagip Saka Act agud mapabaskog ro kita it mga mangunguma ag mangingisda sa pinaagi it direktang pagbakae it gobyerno it andang ani.
Sa sangka dayalogo kaibahan ro 67 Mayors for Good Governance ag mga opisyal it Department of Agriculture (DA), ginhimo ni Pangilinan ro panawagan kon sa siin ginpunto nana nga importante ro papel it mga lokal nga gobyerno sa eubus nga pagpatuman it laye nga ginpasa ko 2019.
Sa idaeom it Sagip Saka Act, ginapasugtan ro mga ahensya it gobyerno ag LGUs nga derektang magbakae it mga produkto halin sa mga mangunguma ag mangingisda nga uwa nagaagi sa public bidding agud daeayon nga tapuson ro papel it mga middleman ag mapataas ro kita it mga mangunguma ag mangingisda.
Ginpunto pa it senador nga ro direktang pagbakae it gobyerno halin sa lokal nga mangunguma hay nagasigurado nga nagapabilin sa komunidad ro nagalibot nga pondo, nga nagabulig sa pag-umwad it lokal nga ekonomiya ag sa pangmabuhayan nga seguridad sa pagkaon.
