Pormal eon nga gintaeana ni Pangueong Ferdinand Marcos Jr. si Atty. Gilberto Teodoro Jr. bilang sekretaryo it Department of National Defense (DND) ag si Dr. Teodoro Herbosa bilang sekretaryo it Department of Health (DOH).
Angot kara, ginpahayag ni Atty. Harry Sucgang, sangka batikang abogado sa probinsya it Aklan nga mas mayad ro ginhimo it chief executive nga ro dating eksperyensyadong opisyal ro ginbutang nanda sa nasambit nga mga ahensya.
Uwa suno kana it kwestyon sa kapasidad it mga raya rason nga dapat taw-an man sanda it tyansa nga maipakita ro andang abilidad sa pagdumaea it mga ahensya nga ginsalig kanda it presidente.
Nasayuran nga si Teodoro hay may maeawig nga eksperyensya sa parehong pribado ag pampublikong sektor.
Nagserbe imaw bilang tatlong termino sa Kongreso nga nagrepresenta sa Tarlac ag dati eon man nga nagdumaea sa kaparehong posisyon ko Arroyo administration.
Samtang si Herbosa mat-a hay may maeawig man nga eksperyensya ag eksperto sa mga sistema it pag-amlig sa ikaayong eawas.
Nagserbe imaw dati bilang Undersecretary sa Department of Health halin 2010 hasta 2015 nga naging kaparte sa nagkaeain-eain nga mga tikang kaparehas it Hospital Accreditation Commission, Modernization of the Philippine Orthopedics Center ag pagtaguyod it Public-Private Partnerships in Health
