KALIBO, Aklan—Presente eon nga naka-isolate sa Aklan provincial ospital ro panibag-ong kaso it Covid-19 sa Aklan.
Raya hay sa katawuhan it sangka 48 anyos nga repatriated overseas Filipino worker nga taga banwa it Kalibo.
Suno kay provincial inter agency task force on Covd-19 incident commander Terrence Jun Toriano, ro nasambit nga ofw hay nauna eon nga nagnegatibo sa RT-PCR test sa Metro Manila rason nga pag-abot sa Aklan matapos nga ginboe-an it uman it swab sample hay ginrefer sa strict home quarantine.
Ginpaathag ni Toriano nga ginkasugtanan nga ipaidaeom sa strict home quarantine ro mga locally stranded individual ag ofw’s nga maga-uli sa Aklan bangud sa kakueangan it pasilidad.
Suno kana, uwa eon it budget ro gobyerno probinsyal maging ro kada LGU’s sa Aklan nga ipabilin pa sanda sa mga qaurantine facility.
Bangud kara, ginatugyan sigon nanda sa kada barangay ro hugot nga monitoring sa mga raya kon sa siin ginataw-an man sanda it kahigayunan agud nga maghueag it husto ro gintukod nga barangay health emergency response team ukon bhert’s.
Ginpahayag dugang ni Toriano nga antes sanda ginatugyan sa barangay hay hugot ro padumdom kanda it mga health authorities kaangot sa sueondanan sa quarantine protocols.
Disiplina eamang sigon ro kinahang-ean para suk-ean ro Covid-19 ag mismong mga natungdan nga indibidwal kara ro makahimo.
