KALIBO, Aklan – Nagapadayon ro imbestigasyon it Numancia Police Station sa natabo nga pagpamaril sa sangka panimaeay sa Purok 2 Bgry. Navitas, Numancia.
Sa pakikipag-agot it Bombo Radyo Kalibo kay Police Staff Sergeant Marlon Del Rosario it Numancia PNP, ro nasambitan nga panimaeay hay ginapanag-iyahan ni Ritchie Morales, 39-anyos ag residente it nasambitan nga lugar.
Ginpahayag kara nga natabo ro insidente, bandang alas-3:30 ro pang-orason ku domingo it aga-aga.
Nabugtaw sigon si Morales kat may mabatian nga sunod-sunod nga eupok it baril.
Sa anang pag-chekyar, nakita na nga may gabot eon ro anang prenti kamana man sa likod nga portion it baeay.
Ginpahayag dugang ni P/Staff Sargeant Del Rosario nga pilang metros eamang ro kaeayu-on maghalin sa anang baeay, may narekober nga an-um nga fired catridge case ag daywang fired bullet it caliber 45 pistol nga baril.
Ginasugid nga may kaaway ro biktima sa andang lugar kung siin raya ro ginatan-aw makaron nga anggulo it mga kapulisan.
Samtang igapaidaeom man sa ballistic examination ro mga narekober nga bala.
