Ginsigurado it Presidential Anti-Organized Crime Commission ro padayon nga pageagas kara sa mga nabilin pang mga indibidwal nga imbolbado sa iligal nga operasyon it Philippine Offshore Gaming Operators (POGO).
Ginkumpirma mismo it tagapaghambae it nasambit nga komisyon nga si Spokesperson Winston Casio nga may una pa sigon nga nabilin nga kapin 9,000 POGO workers ro uwa gihapon nagapundo sa andang ueubrahon samtang nagatinir sa sueod it nasyon.
Suno kana, matapos mareport nga ginausoy eon ro kapin 11,000 POGO workers sa Pilipinas, sobra 1,000 kara hay naaresto, nadakpan ag gindaea eon sa andang kustodiya.
Apang aminado ro nasambit nga tagapaghambae nga ro iligal nga operasyon it mga raya hay ginsawalang bahala ag ginpaiway eamang ro kasuguan it pangueo nga i-ban ro POGO sa nasyon.
Bangud kara, hinambae nana nga makasiguro ro publiko nga andang pagapadayunon ro pag-usoy sa nabilin nga mga trabahador it iligal nga ueubrahon.
Samtang, ginpakigbahin man ni PAOCC Spokesperson Winston Casio nga nagagastos ro gobyerno it masobra 35 milyong piso kada ap’at nga buean para eamang sa mga dumueuong nga POGO workers nag andang nadakpan.
Ginaeauman sigon nga raya hay dumoble bangud ro nakataeana eamang kara hay para sa 500 nga makaron hay nag-abot eon sa sobra snag libo ro presenteng una sa andang kustodiya. Kaya ginpamilit nana nga mahaega nga insigidang mapadasig ro pagproseso sa deportation it mga raya para indi eon mas lalong magbuhay sa nasyon.
