KALIBO,Aklan– Uman nga magaarangkada ro passport on wheels sa probinsya it Aklan.
Raya hay inisyatibo it sangguniang panlalawigan it Aklan ag gobyerno probinsyal kadungan sa passport on wheels nga ginrequest man it lokal nga gobyerno it Kalibo.
Suno kay Merlyn Montaño, focal person it passport on wheels it gobyerno probinsyal nga ginbuoe nanda ro oportunidad nga iya sa banwa it Kalibo ro mga staff it Department of Foreign Affairs ukon DFA kon sa siin nauna ro LGU it pre-registration ag screening ag ro makaron nga adlaw hay gintaeana para sa mga Akeanon maghalin sa nagkaeain-eain nga banwa sa kaparehas man nga proseso.
Maga-umpisa nga magapanagtag it form bandang alas-8:00 it agahon.
Angot kara, gina-engganyo ni Montaño ro gusto nga magbuoe ag ro magarenew it andang pasaporte nga raya eon ro andang kahigayunan para inde eon magbyahe it maeayo ag makabuhin sa andang expenses.
Magaabot eamang it kapin sa P1,200 pesos ro andang magastos ag makaangkon eon it kaugalingon nga passport nga ginahandom it haeos kaeabanan nga indibidwal eabi eon ro may mga plano nga magtrabaho sa ibang nasyon.
Suno pa kana nga siguraduhon eamang nga kumpleto ro andang requirements agud nga tayuyon ro andang proseso bangud nga ro data capturing ag processing date kara hay nakataeana sa Hulyo 25 ag 26 it presenteng dag-on.
