KALIBO, Aklan – – – Naiuli eon pabalik it Negros Oriental ro patay nga eawas ni 2nd District Board Member Atty. Arturo Umbac nga ginsakay it military plane nga gin pahaum it army contingent nga naka-base sa nasambitang probinsiya.
Nagserbeng escort ro mga miembro it Philippine Army Battalion nga naka-base sa Libas, Banga paagto it Kalibo International Airport (KIA) kun siin gintaw-an raya it military honors ag send-off ceremony it mga opisyal sa Aklan.
Si Sanggunian member Umbac hay sangka multi-termer local legislator ag nagserbeng presidente it Negros Oriental Electric Cooperative.
Nasayuran nga aktibo man raya sa scouting movement.
Gina buytan man ni Umbac ro ranggo bilang Brigade Commander it Army Reserve Force.
Si Atty. Umbac hay inatake sa tagipuso-on sa kasagsagan it andang 2-day legislative tour kun siin nag-collapse ro opisyal samtang naga panikangon sa ASQ Bakhawan Eco-Park.
Insigida man nga gin padangat ro opisyal sa sangka pribadong ospital apang, gin deklarang dead on arrival.
