Patay sa dengue sa Aklan, nagsaka eon sa 15

KALIBO, Aklan — Nag-abot eon sa 15 ro namatay sa dengue sa probinsiya it Aklan umpisa Enero 1 hasta Hulyo 6, 2019.

Base sa datus it Aklan Provincial Epidemiology Surveillance and Response Unit, tig-tatlo ro nailistang namatay sa banwa it Balete, Kalibo ag New Washington, samtang daywa sa Numancia ag tig-sambilog sa mga banwa it Ibajay, Malay, Nabas ag Tangalan.

Sa makaron, nagsaka eon sa 2,171 ro kaso it dengue sa Aklan.

Raya hay 100 porsyentong mataas sa kaparehong period ko nagtaliwan nga dag-on.

Kapin sa 22 ro tinamaan it dengue nga owa pa it sang dag-on ro edad samtang 105 man ro numero it nagkasakit nga may edad 51 pataas.

Owa pa it deklarasyon it dengue outbreak sa probinsiya, apang sa emergency status ro mga health workers.