BORACAY, Island — Naka-eksperyensya ro Philippine Coast Guard ukon PCG Aklan it grabeng influx it mga turista ko Semana Santa.
Raya ro ginpahayag ni Lt. Jason Lavadia, commander it PCG-Aklan.
Suno kana nga ko Huwebes Santo hay nakalista sanda it haeos 35,000 nga mga biyahero sa Caticlan Jetty Port kun sa siin kaeabanan sa mga raya hay nagbakasyon sa Boracay.
Nakaangkon man sigon it overcrowding sa mismong jetty port rason nga ro pila hay umabot hasta sa terminal it bus.
Bangud kara, mas pa nanda nga ginpabaskog ro andang security measures eakip ro pag-deploy it dugang nga mga personnel, hugut nga pag-inspeksyon sa mga saeakyang pandagat, ag pag-monitor sa passenger traffic agud nga masiguro ro kaeowasan ag kaayusan it mga biyahero.
Samtang, gindugang pa ni Lavadia nga base sa andang record, nakalista it pagnaba it inbound ag outbound passengers makaron nga dag-on kumpara ko 2024 sa nasambit nga pantalan.
Ko nagtaliwan nga dag-on suno kana hay nakalista it 101,000 nga inbound passengers kumpara sa 96,000 eamang makaron nga 2025 samtang ro outbound passengers hay 76,000 kumpara sa 64,000 nga pasahero makaron nga 2025.
Umpisa Black Saturday hasta Easter Sunday hay amat-amat eon nga nagnaba ro numero it mga turista nga nagapasueod sa Boracay, apang dagsa ro mga naga-ueuli-an.
Sa pihak kara, mabahoe ro andang pasaeamat bangud nga kontrolado nanda ro sitwasyon ag owa it anuman nga nailistang maritime incident.
Kabilugan nga 140 nga mga tawuhan ro andang ginpakalhit ko nagtaliwan nga Semana Santa.
