KALIBO, Aklan—Naka-alerto ro Philippine Coast Guard (PCG) agud nga hugut nga mabantayan ro mga pantalan sa probinsiya eabi eon ro Caticlan ag Cagban Jetty Port bangud sa pagbuhos it mga pasahero ag mga turista nga nagasueod ag nagaguwa sa bantog nga isla it Boracay.
Raya hay angot sa “Oplan Biyaheng Ayos Pasko 2019”.
Suno kay Lt. Commander Marlowe Acevedo, hepe it Philippine Coast Guard (PCG)-Aklan nga naka-heightened alert sanda umpisa Disyembre 16 hasta it Enero 5 it masunod nga dag-on.
Base sa andang datus umpisa ko Disyembre 18, naka-rehistro sanda it 98,507 nga outbound passengers sa nagkaeain-eain nga pantalan sa probinsiya.
Samtang, ro inbound passenger ukon ro mga nagapasueod nga pasahero sa Aklan hay umabot it 103,772.
Angot kara, sigidas ro andang pagpatigayon it pagpatrolya sa baybayon ag nagtukod it DOTR malasakit help desks sa Cagban ag Caticlan ports agud nga magbulig sa mga pasahero nga nagakinahangean it bulig.
Hugut man sigon ro andang pag-monitor sa anuman nga maritime incidents sa lugar nga nasakupan.
Mag-eowas kara, padayun man ro andang pag-usisa sa mga bagahe ag pasahero sa bulig it k-9 units agud nga masiguro ro eowas, masoehay ag maayos nga pagbiyahe kamana man nga mabantayan ro pagsueod it mga kontrabando.
