KALIBO, Aklan—Preparado eon ro Philippine Coast Guard ukon PCG-Aklan para sa igapatuman nga security measures sa Semana Santa sa masunod nga Domingo.
Suno kay Senior Chief Petty Officer Dominador Salvino, deputy commander for operation it Philippine Coast Guard ukon PCG-Aklan nga ginbutang eon sa heightened alert ro andang bilog nga linya agud nga masiguro nga owa it mailistang insidente sa mga biyahero.
Kaibahan ro iba pang mga natungdan nga ahensiya it gobyerno, igapatuman it PCG ro “Oplan: Semana Santa 2024″ bilang pagpahaum sa ginaeauman nga pagbuhos it linibo nga mga biyahero nga maga-uli sa andang natungdan nga mga lugar agud nga magbakasyon kamana man ro mga turista.
Ginpahayag pa ni Salvino nga nagpaguwa eon it mandu si Coast Guard District Western Visayas commander Captain Weniel Azcuna nga mag-deploy it sea assets ag magpatigayon it regular nga pagpatrolya sa kaeawran.
Samtang, hugut sigon nanda nga gina-monitor ro mga pantalan sa aklan partikular sa caticlan jetty port kun sa siin ginapasigurado sa andang pag-inspeksyon nga ro tanan nga mga barko ukon saeakyang pandagat hay bukon it overloaded ag una sa mayad nga kondisyon sa pagbiyahe.
Sa makaron hay minimal pa sigon ro mga biyahero partikular ro mga turista paagto sa boracay apang ginaeauman nga magabuhos ro mga raya umpisa sa Sabado nga adlaw, Marso 24.
Samtang, agud nga malikawan ro mga insidente it pagkaeumos, ginlaygay it PCG nga bantayan ro mga inunga nga nagapaligos sa baybay, kamana man nga indi eon magpilit nga magpaligos kon hilong ag mag-agto sa madaeum nga portion eabi eon kon indi maka intigo nga mag-eangoy.
Sa pihak nga parte, halin sa siyam nga mga gintukod nga sub-stations kaibahan ro una sa Boracay, plano it PCG nga dugangan pa ro mga raya.
Suno kay Salvino nga may pilang coastal towns kapareho it Batan ag Makato nga owa pa it sub-stations.
Agud nga indi makaangkon it aberya sa biyahero, ginpaabot nana nga likawan nga magdaea it mga ginabawae kapareho it mga pampasabog, baril ag iba pang deadly weapons.
