KALIBO, Aklan–Ginpaathag it Philippine Coast Guard (PCG)-Western Visayas nga owa sanda it namonitor nga oil leak paadto sa kaeawran it isla it Boracay ag Panay island.
Raya hay sa pihak it padayun gihapon nga pagtagas it langis halin sa nag-eugdang nga oil tanker nga MT Princess Empress nga may kargang 800,000 liters it industrial fuel oil sa bahin it Naujan, Oriental Mindoro.
Suno kay CG CDR Jansen Benjamin, tagapaghambae it PCG-Western Visayas nga owa eon sanda it namonitor nga langis sa shoreline nga sakop it Sitio Cabang, Brgy. Tinogboc, Liwagao island, Brgy. Sibolo, ag Sitio Tambak sa Brgy. Semirara sa banwa it Caluya.
Sa makaron hay nagapadayon ro pag-bayanihan it mga residente, PCG ag iba pang natungdan nga ahensiya it gobyerno agud nga limpyuhan ro nagtagas nga langis kamana man ro pag-obra it improvised nga oil spill boom ag pag-spray it dispersant.
