Kalibo Aklan —— Uman nga nagpadumdom sa publiko si Action man Galo Ibardolasa it Provincial Disaster Risk Reduction Management Council (PDRRMC) nga magpabilin eon lang ro tanan sa tagsa ka panimaeay agud nga inde eon madugangan ro nailista nga kaso it 2019 coronavirus disease (COVID-19) sa probinsya it Aklan.
Sundon suno kana ro ginapatuman nga social distancing ag ro mga sueondanan nga nakabaehag sa executive order nga ginpaguwa ni Aklan Governor Florencio Miraflores agud nga makabalik sa normal ro tanan sa mas madali nga panyempo.
Ro anang taeatapan suno kana hay ginmanduan nga magtaeana it sangka rescue vehicle nga imaw ro pagagamiton sa pagtransport it mga PUI’s patient kon sa siin ro mga sakay kara hay dapat nakasuksok it personal protective equipment ukon PPE ag ro behikulo hay gilayon nga ginadis-infect matapos it gamit.
Magagamit eon sigon sanda makaron it power sprayer sa pagdis-infect it mga delivery truck nga may karga nga essential goods nga magaagi sa border checkpoint it Aklan ag Capiz kamana man Aklan ag Antique.
Ginpahayag dugang ni Ibardolasa nga nakaalalay sanda sa mga miyembro it Municipal Disaster Risk Reduction Management Office ukon MDRRMO it kada banwa nga sanda ro naga-sikyar sa mga tawo nga nagasueod ag guwa sa andang bisinidad.
Nagapabilin nga 24/7 ro andang operasyon bukon eamang it sa makaron nga tyempo it krisis kundi sa tanan nga adlaw.
