KALIBO, Aklan — Kadungan sa pag-umpisa it Holy Week, naka-alerto ro Provincial Disaster Risk Reduction and Management Office (PDRRMO) sa bilog nga probinsiya it Aklan.
Suno kay PDRRMO action man Galo Ibardolasa nga tuyo kara nga insigidang masabat ro pagkinahangean it mga pasahero angot sa emergency situation nga ginaeauman nga magabuhos sa mga terminal, tourist destinations, mga simbahan ag iba pang matawo nga lugar .
Ginpadumdum pa ni Ibardolasa sa mga nagabakasyon nga doblehon ro pagdahan bangud nga maabung tawo ro magadueutdutan nga kon sa siin pila sigon sa mga raya hay posibleng maghimo it bukon it mayad nga magatuga kanda it disgrasya.
Sa pihak nga parte, ginpahayag pa kara nga kapareho it nakasanayan, may iga-deploy man sanda nga tawuhan sa andang medical station sa Manduyog Hills nga kon sa siin kabulig nanda ro iba pang rescue groups .
Ginlaygayan man kara ro publiko eabi eon ro mga katigueangan nga maging madahan kontra sa makamaeatay nga heat stroke, ag iba pang baeatian makaron nga Holy Week kasunod it naexperiensiyahan nga grabeng init it tiempo partikular sa katung-anan it alas-10 it agahon hasta alas-3 it hapon .
