NUMANCIA, Aklan—Gin-umpisahan eon ro construction sa tulay nga naga konekta sa Brgy. Albasan ag Brgy. Camanci Sur, Numancia nga nauna eon nga ginpasarado it Department of Public Works and Highways ukon DPWH Aklan bangud nga gabok ag peligroso sa mga naga-agi.
Ro proyekto hay may pondo nga kapin sa P9-milyon .
Suno sa contractor nga posibleng maangkon nanda ro pagkompleto sa proyekto sa sueod it tatlo hasta limang buean basta nga owa it magiging aberya ag dere-deretso ro manami nga paniempo.
Oktubre it nagtaliwan nga dag-on, ginkumpirma it barangay council it Albasan nga ginpasarado it DPWH-Aklan ro nasambit nga tulay kasunod it ginpatigayon nga inspection kun sa siin nakita nga bukon eon raya it eowas nga agyan it mga tawo .
Ginasugid nga kinapos sa pondo ro proyekto rason nga nakatiwangwang it mabuhay nga dinag-on hasta nga nagkaea-gabok ro mga materyales.
Nauna eon nga ginreklamo it mga residente ro pagsarado sa tulay bangud nga maabu nga mga pumueuyu partikular ro mga estudyante ro naga-agi kara adlaw adlaw .
