NATIONAL News — Nakadepende sa desisyon it gobyerno it Pilipinas ro anumang posibilidad it temporaryong pagpahilway ag pagbalik sa nasyon ni dating Pangueong Rodrigo Duterte halin sa International Criminal Court (ICC) sa The Hague, suno sa tagapaghambae it tribunal.
Suno kay ICC Spokesman Fadi El Abdallah, kinahangean nga batunon it Pilipinas ro mga teknikal nga kondisyon agud nga taw-an it konsiderasyon it mga huwes ro hinyu para sa interim release ni Duterte.
Maskin nga owa pa it pormal nga aplikasyon, ginpahayag ni lead counsel Nicholas Kaufman nga magadihon sanda it petisyon sa tamang paniempo.
“An interim release can be requested if there is a possibility to put in place measures and conditions to ensure that if a person is released, none of that would happen, and that this person will be brought again before the court if the judges order,” pahayag it ICC spokesperson.
Ginpaathag pa ni El Abdallah nga ro warrant of arrest hay gin-isyu kon nagapati ro mga huwes nga posibleng padayun nga naga-eabag sa laye ro sangka indibidwal, owa nakikipagbueuligan sa korte, ukon posibleng maging paeag sa imbestigasyon ag mga saksi.
May opsyon si Duterte nga magpili it ibang nasyon kun sa siin imaw magapabilin engkaso nga pasugtan ro anang interim release.
Apang suno sa ICC, kinahangean nga makipagkasugot ro sangka estado sa mga gintaeana nga kondisyon antes aprubahan ro temporaryong kahilwayan.
“Now as a matter of principle, the ICC can enter into general agreements for interim release or for other purposes with different states, but can also enter into ad hoc agreements with certain states for specific cases,” pahayag ni El Abdallah.
Gindaea si Duterte sa ICC Pre-Trial Chamber I ko Marso 14 para pormal nga pamatian ro mga akusasyon kontra kana.
Nakataeana ro confirmation of charges hearing sa Setyembre 23, apang ginaeauman nga magasumite imaw it hinyu para sa interim release antes ro nasambit nga petsa.
