KALIBO, Aklan – – – Sa pagsuoed it “ber” months, ginatutukan makaron it Kalibo Police Station ro mga krimen nga posibleng mag-eontad kadungan it waea-tuo nga mga selebrasyon ag aktibidades sa banwa.
Suno kay PO1 Micheal Recto, Information Officer it Kalibo Police Station nagnubo it kapin sa 50 porsiento ro krimen sa banwa it Kalibo ag mataas eon sigon ro naresolba kara.
Gin pahayag ni PO1 Recto nga ro pinaka-masami nga mag-euntad nga klase it krimen hay ro physical injuries tuga it mga selebrasyon kapareho it paskwa partikular sa banwa it Kalibo.
Raya hay gina imbolbaran it mga menor-de-edad nga nagakri-ar it mga kinagamu tuga man it impluwensiya it makahieilong nga ilimnon.
Dugang pa ni Recto, kaeakip man ro physical injuries nga tuga man it mga vehicular accidents sa mga daeanon kon sa siin raya sigon ro mga common crimes nga gina-anticipate it mga kapulisan nga maga-eontad sa sueod it “ber” months.
Samtang, indi man makatao it kumpyansa ro Kalibo Police Station sa posibleng pag eontad it mga krimen kapareho it paeanakawan ag mga salisi.
Apang, ginpasiguro man ni Recto nga haum ro linyada it Kalibo Police Station sa anuman nga mag-eontad nga krimen bangod na-antisipar eon nanda ro mga raya agud maprotektahan ro mga propiedad ag kabuhi it mga pumueoyong Aklanon sa bug-os nga probinsiya.
