KALIBO, Aklan–Posible nga maideklara bilang African swine fever ukon ASF free ro bilog nga probinsya it Aklan sa masunod nga mga binuean kon uwa eon it mailistang kaso it tinamaan it nasambit nga masakit sa sapat.
Raya hay matapos nga nagpaguwa it updated zoning progression ro Bureau of Animal Industry central office.
Suno kay Dr. Mabel Siñel it Office of the Provincial Veterinarian, ko Disyembre 2025 hay na-upgrade eon sa yellow zone ro mga banwa it Banga, Balete, Buruanga, Nabas, Madalag, Malinao ag New Washington kon sa siin pwede eon nga makaamat-amat ro mga hog raisers it pag-alaga it baboy bangud nga uwa eon it nailista nga kaso it ASF halin ko mga nagtaliwan nga buean.
Samtang, nagapabilin sa red zone ro mga banwa it Kalibo, Ibajay ag Lezo.
Apang, uwa eon man it reported ASF cases halin ko buean it Disyembre 2025.
Sa pihak kara, ro mga nabilin nga banwa hay na-categorize sa pink zone kon sa siin kinahang-ean gihapon ro maid-id nga pagdahan sa pag-alaga it sapat bangud sa pwede gihapon magtuhaw ro ASF apang pwede eon makaamat amat it pag-alaga it baboy.
Magapatigayon ro natungdan nga ahensya it gobyerno it testing eabi eon sa mga pagabutangan nanda nga tangkae bangud nga kaabuan sa mga namatayan it baboy hay sa ugsaran eamang gin-eobong ro sapat.
May requirements nga ginatao sa hog raiser para masiguro nga eowas ro andang mga alagang sapat.
Sa makaron suno kay Dr. Siñel, sa Western Visayas ro na-upgrade eon sa pink zone hay ro probinsya it Guimaras, Negros ag Antique samtang ro probinsya it Aklan, Iloilo ag Capiz hay nagapadayon ro pagproseso it zoning progression.
