KALIBO, Aklan—Nagapabilin nga maeanghay ro numero it mga turista nga nagabisita sa isla it Boracay matapos nga ipaidaeom sa Alert Level 3 ro pilang lugar sa nasyon.
Suno kay Police Lieutenant Colonel Don Dicksie De Dios, hepe it Malay Municipal Police Station nga may pilang restaurant ag establisyemento ro temporaryong nagsarado bangud sa kawad-an it costumer.
May pilang airline company man nga nagbawas it biyahe paadto it Boracay.
Agud nga masiguro ro kaeuwasan it mga residente ag bakasyunista, uman nga gin-require it lokal nga gobyerno it Malay ro pagpakita it negatibong resulta it RT-PCR test sa mga non-Aklanon tourist.
Samtang, bangud sa sigidas nga pagtinaas it kaso it COVID-19 nakaangkon man it pilang adjustment sa operasyon it mga negosyo ag curfew hour sa isla.
Ginpasiguro ni De Dios nga padayun nga naka-alerto ro mga kapulisan ag hugut nga ginapatuman ro health and safety protocols.
Samtang, nagapabilin nga matawhay ro sitwasyon sa bilog nga isla Boracay ag mainland Malay sa pihak it pag-arangkada it election period.
Owa pa sigon sanda it nadakpan nga nag-eabag sa ginapatuman nga Comelec checkpoint ag gun ban.
Nagaeaum ro pamunuan it Malay PNP nga magiging malinong ag matawhay ro nagahilapit nga May 9, 2022 national and local elections.
