Kusa eon nga nagpundo sa pagpamasada ro mga operators and drivers it traditional ag modernized jeepney sa idaeom it Cooperative Alliance for Modernized Transport Business Industry Operation bangud sa inde masarangan nga presyo it produktong petrolyo.
Suno sa kay Louie Tabios, presidente it nasambit nga grupo, haeos doble ro andang gastos kaysa sa ginakita halin kat sunod-sunod ro pagtaas it presyo it langis kon sa siin eubus sanda nga nalisdan sa andang sitwasyon nga haeos gaoy eon lang ro andang ginauli sa andang tagsa ka pamilya.
Dugang pa nana nga inde eon nanda masarangan ro padayon nga pagtimbook it presyo it langis rason nga kusa eon lang nagpundo sa pagbyahe ro andang ibang miyembro ag nag-usoy eon lang it ibang source of income nga makabuhi sa andang pamilya nga makakaon it bastante sa sueod it sang adlaw.
Bukon eon suno kana it makatarungan ro andang presenteng sitwasyon maskin nga may ginahimo man nga tikang ro gobyerno kaparehas sa pagpanupod it ayuda bangud nga bukon gihapon raya it bastanteng bulig para sa andang ginapas-an nga kalisdanan makaron nga panyempo.
