KALIBO, Aklan— Gintaw-an it 15 diyas nga ultimatum it Boracay Inter-agency Rehabilitation Management Group (BIARMG) ro pilang mga kilaea ag maeagkong hotel and resort sa isla it Boracay nga hasta sa makaron hay uwa gihapon ro mga raya naka-comply it mga nagakaigong dokumento agud maka-operate it uman it andang negosyo.
Ginpahayag ni Dir. Natividad Bernardino, general manager it BIARMG sa interview it Bombo Radyo Kalibo, nga may una sandang mga nadiskubrehang mga establisyimentong naga-operate nga uwa it nagakaigong permits and clearances ag nag-eampas ro mga raya sa required coastal easement regulation.
Ginbulgar it opisyal ro Steve’s Cliff/Boracay Terraces Resort; Willy’s Rock Resort; Boracay Plaza Resort; Little Prairie Inn; Watercolors Diveshop; Blue Lilly Hotel; Exclusive Dawn VIP Boracay Resort; True Home; at New Wave Divers nga makit-an tanan sa Station 1 area ag ro Calveston International Inc. sa Station 2.
Samtang, ginkumpirma ni Bernandino nga eowas eon nga mapaligsan ro Bolabog beach nga una eon nga naging kontrobersiyal ko Boracay closure bangud sa nadiskubrehang mga maeagkong tubo nga halin sa mga maeagkong hotels nga nagapaguwa it higko sa baybayon.
Pasado eon sigon ro water quality sa isla it Boracay ag ginaeauman eon ro pagbuhos it mga turista ag bakasyunista sa nagahilapit nga summer season.
