KALIBO, Aklan—Nadayun ro pilang mga aktibidad ko Huwebes nga adlaw sa isla it Boracay maskin nga owa naka-abot si Pangueong Rodrigo Duterte.
Nauna eon nga ginkumpirma ni Presidential Spokesperson Salvador Panelo nga bangud sa pag-abu it kaso it tinamaan it coronavirus disease ukon COVID-19 sa nasyon hay owa nadayun ro pangueo sa Boracay.
Suno kay Malay mayor Frolibar Bautista nga nagpadayun ro pagpanupod it Certificate of Land Ownership Award (CLOA) sa 1,998 nga mga agrarian reform beneficiares sa bilog nga Western Visayas nga ginpatigayon sa Barangay Manocmanoc sa isla nga ginpangunahan ni DAR Secretary John R. Castriciones.
Sa nasambit nga numero, 42 kara ro nakataeana sa Aklan, kun sa siin, ro 31 hay naghalin sa isla it Boracay nga puro mga miyembro it Boracay tumandok agrarian reform beneficiaries organization ukon mga ginakabig nga occupants of public land.
Raya eon ro ikaywang beses nga nagpanupod it CLOA sa Boracay.
Ginpahayag dugang nga naging haeuga ro andang venue bangud ro ginaeauman nga 700 nga mga bisita hay haeos 400 eamang ro nag-abot.
Sa pihak nga parte, maskin nga owa it quorum, ginpadayun man sigon ro meeting it Boracay Inter-Agency Task Force kaibahan ro mga stakeholders, kun sa siin, gintalakay ro nagapadayun nga rehabilitasyon it isla ag iba pang concerns.