KALIBO, Aklan — Ginatos nga mga Pilipino ro nagtililipon sa atubang it Scheveningen Prison sa The Hague, Netherlands, agud nga ipakita ro andang suporta kay dating Pangueong Rodrigo Duterte samtang ginahueat ro pag abot it anang convoy.
Raya ro ginpahayag ni Sherlyn Spaans, Bombo International News Correspondent sa Netherlands.
Nagkanta ro mga tagasuporta it Lupang Hinirang ag ginwagayway ro bandera it Pilipinas.
May bitbit man sigon nga placards ro iba nga nagahambae it “We love Duterte” ag “Bring him back” samtang nagasueod ro convoy ni Duterte sa pasilidad.
May pila pa nga nagbiyahe halin sa nagkaeain-eain nga siyudad sa Netherlands ag kaiping nga mga nasyon kapareho it Germany.
Nagtugpa ro eroplano ni Duterte sa Rotterdam The Hague airport ag pagkatapos hay ginderetso sa Scheveningen Prison.
Sa pihak nga parte, kapareho nana , maabu pa sigon nga mga tagasuporta ni Duterte sa Netherlands ro owa napugngan nga maging emosyunal sa anang pag-abot bangud sa kaeo-oy nga nabatyagan sa dating presidente.
Pagadaehon si Duterte sa ICC judge sa The Hague sa masunod nga mga inadlaw para sa initial appearance.
Nauna kara, ginpahayag ni Duterte sa sangka video message nga maayos ro anang kahimtangan.
