NATIONAL News — Padayun ro pag-eapnaag it pagpang-bully sa mga eskwelahan sa Pilipinas, eabi eon sa Metro Manila, suno sa report it Second Congressional Commission on Education (EDCOM II).
Sa pihak it ginapatuman nga laye ag polisiya, nagapabilin raya nga mabahoe nga problema sa nasyon.
Suno sa 2018 Programme for International Student Assessment (PISA), 65% it Grade 10 students sa Pilipinas ro naka-eksperyensiya it pagpang-bully pilang beses sa sang buean, pinakamataas sa tanan nga nasyon nga nagpasakop sa study.
Nagnaba it sangkiri ro numero sa 2022 PISA, apang sambilog sa kada tatlong estudyante gihapon ro biktima kada domingo.
Umpisa Nobyembre 2022 hasta Hulyo 2024, 11% eamang it gin-report nga kaso it pagpang-bully ro nasolbar.
Pinakamataas ro numero sa Metro Manila, Calabarzon, ag Central Luzon, samtang sambilog eamang ro napabalita sa Mimaropa, Bangsamoro, ag Soccsksargen.
Suno sa EDCOM, posibleng raya hay bangud sa pagkakaiba sa kamayad it mga reporting systems sa nagkaeain-eain nga rehiyon.
Mag-eowas sa pisikal nga pagpanakit, ginpamilit it EDCOM nga may iba pang klase it pagpang-bully kapareho it verbal, relational, ag cyberbullying.
Gin-engganyo kara nga bag-uhon ro Implementing Rules and Regulations (IRR) it Anti-Bullying Act of 2013, nga ginakabig nanda nga luma ag owa eon nagakasinanto sa presenteng paniempo.
Agud nga raya hay masabat, nagbilog ro EDCOM it sangka technical working group nga ginaeakipan it mga opisyal it DepEd, child protection advocates, ag mga researcher sa edukasyon.
Gindayaw man ni Education Secretary Sonny Angara ro pagtinguha it EDCOM ag ginpamilit ro pagkinahangean nga makasunod ro mga reporma sa mga tikang it gobyerno para mapamayad ro sistema it edukasyon sa nasyon.
