BALITANG Espesyal — Sangka restaurant sa Iisalmi, Finland ro nakalista it world record bangud sa pagiging maisot kara!
Ko 1994, gintau it records keeping organization nga Guinness World Records sa restaurant nga Kuappi ro titulong “World’s Smallest Restaurant” bangud sa sukat kara nga 86 square feet.
Pagkataliwan it 30 anyos, owa sa gihapon it may nakapiyerde sa nasambit nga record ag ro Kuappi gihapon ro nagapabilin nga pinakamaisot nga restaurant sa bilog nga kalibutan.
Suno sa tag-ana kara, tuyo it pagpatindog it Kuappi nga makatau it kakaibang eksperyensiya sa pagkaon sa mga bisita.
Ro restaurant hay gindesinyo para eamang sa daywang tawo, rason nga nag-offer raya it sangka masyadong-intimate ag eksklusibong setting para sa kaean-an.
Dugang pa kara nga ro konsepto it Kuappi hay bukon eamang para mag-serve it pagkaon kundi agud nga magtukod it sangka memorable nga eksperyensiya nga kakaiba sa ordinaryong mga restaurant.
Ro kakaibang sukat ag setting it Kuappi hay naging sangka atraksyon sa mga turista ag mga lokal nga naga-usoy it espesyal nga dining experience.
Bukas eamang ro Kuappi kada summer season.
Agud nga makapag-dine in kara, kinahangean nga magpa-reserve it daywang adlaw in advance bangud nga sikat raya sa mga turista ag pati man sa mga lokal nga residente.
