KALIBO, Aklan — Arestado ro sangka pintor sa ginkasa nga drug buy bust operation it mga otoridad, Lunes it hapon sa Lambingan Beach sa Brgy. Pook, Kalibo.
Nakilaea ro suspek nga si John Lee Tolentino, 24, residente it Oyo Torong St. Kalibo.
Nagpositibo ro transaksyon it mga otoridad matapos nga mabo-oe halin kay Tolentino ro an-um nga sachet it ginadudahan nga shabu ag P4,000 nga marked money.
Gindaea sa Kalibo Police Station ro suspek ag mga nakumpiskang item para sa nagakaigo nga dokumentasyon.
Sa sunod-sunod nga operasyon it mga otoridad, nauna eon nga nadakpan ro dating drug suspek nga si jilson Lopez, 37, tumandok it Negros Occidental ag presenteng naga-istar sa Brgy. Pook, Kalibo.
Nabak-ean si Lopez it nagpakuno-kuno nga buyer it sangka mabahoe nga sachet it ginadudahan nga shabu sa balor nga P8,000.
Ko dag-on 2014 hay nakulong si Lopez bangud gihapon sa pagbaligya it droga, apang nakaguwa ko Agosto 2018 pinaagi sa plea bargaining agreement.
