Kalibo Aklan —— Nagpadumdom ro pulisya sa publiko nga likawan ro pagpakalhit it saea nga impormasyon ukon fake news sa tunga it ginapangatubang nga 2019 coronavirus disease (COVID-19) pandemic.
Suno kay Police Major Bernard Ufano, head it Provincial Intelligence Section (PIS-Aklan) nga uwa it manami nga ituga ro pagpost sa social media account it balita nga uwa it basehan ag bukon it sa reliable sources naghalin.
Ginpaathag ni P/Maj. Ufano nga engkasong madakpan nga nagapakalhit it saea nga balita hay pwede nga magapangatubang sa nagakaigo nga kaso sandig sa Republic Act 11469 ukon Bayanihan to Heal As One Act.
Sa idaeom it nasambitang laye, pwedeng makulong sa sueod it daywang buean ukon paga-imponeran ka it penalidad nga kapin sa 10,000 pesos ag inde magsobra sa P1-milyon pesos.
Inde sigon makabulig sa tunga it pandemya ro pagta-o it kabaeaka sa publiko bangud nga mas kapin pang maga-panic ro mga makabasa ag makabati it saea nga balita.
May kaangtanan kara, ginhinyo ni P/Maj. Ufano ro tanan nga maid-id nga usisaon anay ro mga sources it nabasahan ukon nabatian nga mga impormasyon antes nga i-post sa kaugalingon nga social media accounts ukon isugid sa mga kakilaea para uwa it saeabton sa laye.
